التاريخ : 2014-04-10

الراي نيوز 

 

اسمه الاول على وزن نحيف .. وبالصف واقف عريف .. وبشغله مخربط ودايما ضعيف .. وبقول عن حاله ما اله وصيف .. سكن المدن وهجر الريف .. وحياته بغرب عمان .. وما بعرف النظيف .. بحكي مع الناس بفوقيه وتكليف.. اسمه الثاني من الخلود .. وعند ما تنخاه الزلمة مش موجود .. وطريقه دايما مسدود .. وبالوزارات دايما موعود .. وعند ربعه مش محمود .. داير بين سدني وسنغافورة والحكومة بتدفعله الفاتورة .. ومن دحديره لجوره و ما حدى بعرفله شكل ولا صوره .. وسوالفه مش مسموعه وزي الميه المهدورة .. معروف شو كان بالعمل تركها وعنها رحل .. وعليه ما حدى سأل .. وبحب كثرة الحكي والجدل .. ويستعرض زي البطل وبالواسطة والمحسوبية للوزارات وصل .. وعلى حاله لا تعب ولا اشتغل .. وعلى غيره اتكل وما بميز بين الفجل والبصل .. صوته فيه بحه وبتشوفه كله كشخه وبهتز من مزحة وبقع من اول قحة وبتعرفه من اول لمحه. بتنقل بين الوزارات وبحب يغير سيارات ويملك الكثير من العقارات وموجود بالمطارات ومهتم بالتطوير وما عنده تطورات وبهرب من الغارات والجايات عليه اكثر من الرايحات ومش خبير بالازمات.